郭可盈同林文龍喺5月時被揭有一段疑似兩人電話聲帶外洩，係同內地經理人汪子琦嘅電話錄音，內容係講因為林文龍同內地女藝人董維嘉有婚外情，但其間牽涉一宗勒索案，於是夫婦二人召開記者會，佢哋已經喺內地同香港分別報警處理，而汪子琦據講亦俾內地公安拉咗去拘留所調查。
嚴淑明撐汪子琦
事件發生後郭、林二人未有再公開露面，事隔兩個月呢件事到家又有新進展，汪子琦旗下嘅藝人嚴淑明早前表示，話汪子琦已經放番出嚟，遲啲仲會開記者會，同時有報道話林文龍本來多番要求離婚，但係佢同郭可盈嘅錢銀轇轕數不清，每次郭可盈都要求佢還過百萬先肯離婚。
噚日林文龍喺電話度話：「我唔回應呢啲問題，由得人點寫都好，我完全nocomment，我唔會回應啲不負責任嘅報道。」問到汪子琦釋放咗話會有記者會，林文龍話：「我唔講呢啲嘢。」
另外，嚴淑明噚日對汪子琦釋放後舉行記者會一事話：「佢（汪）家要平復同安靜吓心情先，因為無端端去咗拘留所咁耐，呢件事唔係外界講到咁，我哋公司好團結，汪子琦唔係郭可盈嘅中介人而係經理人，我哋唔係盲目嘅，如果汪子琦係咁嘅人，我哋就同佢解約，其實係個男嘅有問題，佢做啲嘢好差，唔可以咁樣對人，本來我哋有部電影已經拍咗準備上映，又有劇集開拍，點知因為呢單嘢全部hold住咗，汪子琦可能係一個衝動嘅人，但係唔會去害人，又唔會做犯法嘅事。」嚴淑明又話汪子琦一直好保護可盈，希望佢哋兩公婆和好。