射龜遊戲，相信好多人細個都玩過，我求大俠就試過喺屋邨同人鬥波輸咗，被迫企埋牆俾人射屁股。中國國家足球隊前晚練波都玩呢種玩意，12個俾人射嘅得1個被省中股，命中率奇低。
我初初諗，會唔會係隊友相親相愛唔願省人，但了解埋佢哋射龜前嘅正式練射門命中率係120射15中，就令我懷疑，班國足兵唔省中係不能也，非不為也。
國足近日喺河北集訓，備戰嚟緊禮拜六對巴勒斯坦，同埋下星期對吉爾吉斯嘅友賽，但隊波噚日公開俾記者觀操之前，一直玩神秘，教練高洪波就話想練秘密戰術，但國內記者行家就唔係咁睇，係話班球員射術太曳，所以獻醜不如藏絀喎。
120次射門僅15中
話說前晚高洪波安排分隊進行練習賽後，就進入射門練習，黃隊（包括郜林、趙旭日）、藍隊（包括杜威、韓鵬）各派球員喺禁區外斬波，然後喺12碼點球不着地埋門，你估最後成績係點？雙方各射60球，合計120球，最後黃軍險勝藍軍8:7，即係只入15球；我求大俠並冇身處現場，有另一個講法係佢哋只能用頭頂，但頭又好，腳又好，呢個成績點講都好難見人。所以，當去到最後射龜都射得差，何奇之有？
「國家隊換血後繼承了『優良傳統』，連射屁股都得一個人中，搞封閉是必然的！」呢句話係國內網站引述國內行家所講嘅，愛之深，責之切，今次事件，查實笑中有淚，大家笑完，都想國足振作啫。
送即食麵引球迷入場
講番嚟緊兩場友賽，據講主辦組織怕有冷場，已為票價打個9折，同時為買指定等級嘅門票持有人，送上即食麵一箱，仲要標明多買多送，家陣超市賣廣告咩，唉……
知多啲：國足大賽唔識入波
108唔只係梁山泊好漢嘅數目，仲係家陣國足隊嘅世界排名。國足近年對稍具份量嘅球隊，成績當然唔好，而睇真啲，如果唔計友賽，對上幾場對世界排名前90球隊嘅世盃外就只入得1球，正好解釋國到足點解入唔到明年世界盃決賽周。中國咁多人口，要搵啲識喺重要比賽入波嘅人，真係咁難？
國足近年主要比賽成績
04/06/09 友賽 主負沙地阿拉伯1:4
01/06/09 友賽 主勝伊朗1:0
29/05/09 友賽 主和德國1:1
09/01/09 友賽 客負伊朗1:3
19/12/08 友賽 中負伊朗0:2
22/06/08 世盃外 客勝澳洲1:0
07/06/08 世盃外 主負卡塔爾0:1
02/06/08 世盃外 客和卡塔爾0:0
23/04/08 友賽 中和薩爾瓦多2:2
16/04/08 友賽 中負墨西哥0:1
來源： http://www.fifa.com
註：只計世界排名前90名球隊