劉美君榮膺金馬影后後人氣升呢，近日獲Audi大手筆送贈逾200萬元的R8跑車，日前她出動新戰驅拍攝無綫節目《超級巨聲》宣傳片，大腳踩油勢兇夾狼。44歲玩飛車未「慄」過，這位辣媽的確潮夾勁。
劉美君日前駕駛一部價值超過200萬元的AudiR8型號跑車現身又一城，原來當日她為無綫新節目《超級巨聲》拍攝宣傳片，現場見她一頭亂髮配上緊身tee兼踢拖，由駕車師傅陪同下試車，不過師傅揸了兩圈後，劉美君已急不及待跳上司機位，親自揸車研究車輛性能。
企馬路扮豹妹
隨後劉美君載同女助手到附近，停車後打開車尾箱視察機件，接着她三度揸出馬路試車，見其駕駛技術狠辣，下下大腳踩油，繼而再駕車往尖沙嘴，並在公路停車拍外景，她在車廂換過高跟鞋後竟膽生毛站出馬路邊，又在工作人員面前扮豹妹。不過她拍宣傳片時一take過搞掂，過程快夾爽。
據悉劉美君今次坐擁新車，斗零都不用花，事關有Audi贊助送車。其實去年她憑電影《性工作者2我不賣身．我賣子宮》膺金馬影后後工作不絕，最近接下26集的《超級巨聲》主持工作，9月出新碟，又有片約斟洽中。由於劉美君家在美國，既然下半年在港扎根，揸車自然更方便出入。
劉美君的正東唱片發言人昨說：「劉美君舊年開演唱會，舞台上放咗架車係Audi嘅，嗰時Audi已經贊助佢，家直情畀埋架車由佢揸。」原來方中信與劉美君口味一致，因他也擁有同型號跑車。
採訪、攝影：黃曉程