【09書展之變招出擊】o靚模兵團打正旗號行性感，圖由MK踩去書展會場，據悉Lavina、Rainbow和ECupBaby等原定下周三到書展硬銷水着寫真，但反o靚模網民群情洶湧，o靚模疑因受壓取消簽名會，不過，一眾o靚模已度橋還魂，以私人身份殺入書展一樣得。
近月o靚模大軍殺入娛樂圈鬧翻天，有人支持生力軍加入百花齊放，有人不屑她們sell性感做爛市，但o靚模人氣高企，鍾蕙芝（Lavina）、胡心諾（Rainbow）和劉欣宜（ECupBaby）的曝光率確實勁過時下偶像。
自稱寫真售罄
早前幾位o靚模在深水埗舉行《夏之盛放》寫真集簽名會，惹來大批龍友、宅男大包圍。據悉她們原定再斬四両計劃跳出九龍，在下周三拉隊去灣仔會展，於首日書展舉行簽名會，奈何網上反o靚模聯盟反應太激，o靚模疑因受壓，決定取消會展活動，但投資方Sony則表示因寫真集快將售罄故不搞簽名會。
Lavina、Rainbow和ECupBaby等雖未能在書展中為寫真集搖旗吶喊，不過企會展邊皮或以私人身份參觀卻無不可，三女昨異口同聲表示會到書展一遊，誓要一沾書卷味。對於未能舉行書展簽名會，Lavina接受電話訪問時說：「唔可惜，本書幾好成績，之前都舉行過簽名會啦。不過我都會去書展，往時年年都去嘅，唔使工作嘅情況下仲輕鬆啦。」
有網民謂出寫真的o靚模應滾出書展，Lavina則說：「過往書展都有其他藝人出過寫真集，只不過今年好多o靚模推出，大家先覺得好氾濫，其實我哋影嘅水着look都係將最靚嘅一面展示出嚟，我好希望大家會接受。」
斥周秀娜過火
Lavina又聲稱沒有為此而不開心，她說：「唔會嘅，因為始終我哋本寫真集係健康嘅性感，可能係有啲同行嘅、其他嘅o靚模出嘅寫真集就有啲踩界囉，因為見到佢哋啲寫真集意識真係幾過火，有時食啲雪糕又滴晒落個心口度，又話買書會送飛吻呀。」擺明針對周秀娜。
ECupBaby被問到書展簽名會泡湯時，以超大反應反問：「係咩？我唔知喎！應該冇活動㗎，啲書都賣晒啦，成績咁好。」又謂會與哥哥一起逛書展，也會買其他o靚模寫真作參考。
Rainbow對取消簽名會一事揚言未有所聞，但她會以私人身份去書展睇書，她說：「往年我不嬲都有去，唔使工作嘅話，今年我都會同朋友去行吓。」她也不認同其影寫真是刻意賣弄性感：「照片都好健康、好靚，而且呢啲係我哋嘅工作，我覺得大家應該對我哋嘅付出支持，而唔係反對。」採訪：林妃