o靚模應否出席書展已變成社會話題，facebook先有群組反o靚模，集合近4萬網民力量誓要踢她們出書展，200電車男不甘心儀女神被恰，設反反o靚模群組還拖，但200人對4萬人，戰況凄厲過《戰狼300》。文化演藝界也有不同聲音，不過狀況跟網戰調轉，撐多反少，倪匡、王貽興及蘇施黃等都撐o靚模出書。採訪：吳佩思、丁寧
撐o靚模派
倪匡（作家）：
女人嘅身體係好靚嘅，唔着都冇問題呀！咁佢哋係咪冇着衫呀？唔係即係冇犯法囉，有乜嘢問題呢？人體美都係文化嘅一種，文化係應該要包容，唔應該排斥人，咁係野蠻人嘅行為，唔係文化。你唔鍾意可以唔好去睇，唔好去買，或者行遠啲，冇理由去反對人哋㗎嘛！舊年我去書展，好多女仔送寫真畀我睇，不知幾好睇呀，啲相影得好靚，文字說明又美觀。好多人都好虛偽，個個都道貌岸然，乜都話反對，其實不知幾鍾意睇。
王貽興（作家）：
如果你講到書展咁神聖，點解又冇乜人知呢？有道德標準係好事，但家有太多人渾水摸魚，自己企喺道德高地，但其實雙重標準，喺度抽水。書展係一個自由地方，你唔同意可以唔好買，如果本書唔賣得嘅出年都冇得去啦，咪由市場去決定囉。
鄭丹瑞（監製）：
香港係一個自由社會，最珍貴就係有出版自由，其實邊個都有權出書，最重要係有冇人去買，如果咁樣（o靚模在書展出寫真）可以吸引到更多人嚟睇，都係無可厚非，而且書展的確一年成功過一年，惟有鼓勵啲文化人爭氣。呢個係良性競爭，如果出書輸畀o靚模就好冇面喇。
蘇施黃（飲食節目主持）：
寫真集都係書，咁書商都要賺錢，而且書展都係o靚仔去，點解唔得。當年鄭文雅出寫真，我都買三本睇到爛啦，但係嗰啲阿豬阿狗都寫埋唔知乜嘢書就唔得囉。
彭志銘（文化人）：
書展已經由文化活動變成商業活動，只要有錢搵，商人一定去做。網民最興少少事就大肆討論，但有份鬧嘅人一定有份去睇，好虛偽。除非有道德佬去會場示威啦，否則應該唔會有一啲有組織嘅人去杯葛囉。
反o靚模派
Facebook反o靚模群組：
過往明星的宣傳活動就造成了嚴重的噪音，更阻塞通道，也令到越來越多愛書人因不滿安排而放棄入場，間接扼殺了其他書商和新晉作家難得的交流機會。我們不能接受的，就是o靚模於書展中賣弄性感，令到書展演變成一個「人肉展覽」！
張堅庭（導演）：
書展應該畀人睇到唔同類型嘅書，如果定位唔清晰，家長就唔會嚟，一陣見你又水着又商業化，更加冇興趣嚟。至於嗰啲o靚模，寄語一句，唔好以為剝得越多就越得意，錯喇！我哋需要嘅係演戲要識演戲，唱歌要識唱歌，剝衫根本冇技巧，我夠識剝啦！
鄺美雲（藝人）：
我覺得書展係應該買啲有文化、實用同有教育意義嘅書，書展係想開啟人類智慧，如果係私人寫真集，要睇吓意識係點，唔係冇露到就冇事，有時意識大膽都有一定影響。家啲風氣我都唔識講，其實好難唔畀賣，最多係唔去買，我自己個人就唔會睇唔會買，所以啲家長要去指引女子買書比較好。
