英格蘭中場碧咸同佢嘅美職聯洛杉磯銀河隊友當路雲呢場大龍鳳，隨住型咗又fit咗嘅「萬人迷」禮拜一歸隊復操之後，告一段落。不過，我求大俠睇見碧咸喺陽光普照嘅加州練波時好似心事重重咁，無他嘅，因為佢心繫英超，想喺美職聯球季結束後返去又凍又陰沉沉嘅英格蘭，以爭取踢2010世界盃嘅機會。
現身銀河操練息風波
早前當路雲狂插碧咸冇隊長風範，而且自私又小器，而碧咸就反擊話當路雲將「家醜外傳」唔專業；不過，喺禮拜一碧咸復操時，佢就話：「我同當路雲同埋教練艾連拿傾過，事情已告一段落。」碧咸仲話唔介意當路雲繼續做球隊隊長㖭！而當路雲亦話：「我好後悔自己就今次事件嘅處理手法，亦後悔公開講過某啲嘢；不過，家攤開咗嚟講，大家乜都清楚晒，咁仲好。」兩人仲話會集中精神備戰禮拜四對紐約紅牛嘅聯賽㖭！
表面睇嚟，碧咸真係好大方，而且見到佢一復操身形已甚弗，清減咗少少反而仲型咗，配合埋加州陽光，呢幅構圖真係好鬼靚；不過睇真啲，點解佢若有所思咁呢？原因好簡單，因為佢已經諗緊呢個美職聯喺冬天結束後，好似上季咁再次外借去歐洲踢波嘅事。碧咸話：「喺美職聯球季結束之後，我一定會再次去歐洲球隊踢波，我知道咁做一定會惹嚟閒言閒語，但係我唔會理。」
講明為踢世盃想返歐洲
後碧咸講得仲白：「我會做任何事去增加自己入選2010世界盃隊嘅機會，再次以外借身份到AC係選擇之一，而我亦唔會排除加盟英超球隊。當年我離開曼聯時，雖然曾經講過唔會再踢其他嘅英超隊，不過，世事無絕對，我家一定會考慮踢其他嘅英超球隊。」照碧咸咁講，由前AC主帥安察洛堤執教嘅車路士，同埋碧咸曾經喺度操練嘅阿仙奴，都有可能係「萬人迷」嘅落腳點。
雖然英格蘭天氣唔係天陰陰就雨濛濛，冬天嘅時候真係凍到甩髀，同風光明媚兼氣候怡人嘅美國加州冇得比，但碧咸都30有4啦，想再踢世界盃決賽周嘅機會唔係咁多㗎啦，有得博梗係要博啦，話之你銀河嘅人有乜嘢閒言閒語吖！