海鮮檔劏龍躉好大件事，油麻地果欄噚日亦出現「龍躉」，其中一個商號鉅記有個71公斤重、近兩呎長嘅超級大西瓜，堪稱瓜中龍躉，鉅記老闆韓亮賢同八方講，呢個超大西瓜來貨價約3,800蚊，係日本鳥取縣特產，較一般西瓜大七倍，有幾個籃球咁大。八方見到咁大個瓜O晒嘴，喺果欄行走50年嘅朱生亦話未見識過，嘖嘖稱奇。
唔怕撞瓜人
賣花姑娘插竹葉，韓老闆話唔捨得自己食，估計個瓜唔會太甜。既然好睇唔好食，個西瓜擺喺度好嘥啫，八方強烈建議一哥特警成買起佢，並非與下屬分甘同味，而係畀交通部，下次追截飛車時，擺幾個超級大西瓜喺公路做roadblock，唔好再搵市民做人肉沙包嘞，飛車黨煞掣不及最多撞瓜，唔會撞瓜人。
不過九龍城富貴水果店永富老闆陳錦輝可能認為撞瓜暴殄天物，佢去年開始引入呢種鳥取大西瓜，舊年最巨型個西瓜有80公斤重，賣6,800蚊，擺出店面唔夠一個禮拜就由一個熟客買起，做母親大壽賀禮。陳錦輝話壽宴筵開五席，大概60幾人，一個大西瓜夠晒食有凸，「個客話個大西瓜好甜，起晒沙。」
輝哥苦笑話客人買大西瓜賀壽夠體面，食得招積，卻有向隅熟客同佢詐型，有見特別水果有市場，所以今年再訂大西瓜，估計月底前到港。輝哥稱據佢所知，今年鳥取農場種出四個超級大西瓜，最大一個重90公斤供日本內銷，其餘三個都空運到港，分別係80公斤、71公斤同50幾公斤，「我要咗個最大嘅，打算賣6,000蚊。經濟唔好，咪賣平啲。」
冇基因改造
至於其餘兩個，行內人稱上述71公斤重嘅，應該名花有主，由九龍城或淘大一水果店買入，至於最「細」嗰個，落入高檔超市手中，如果斷磅賣，八方都有本錢買些少品嚐超級大西瓜味道。輝哥指大西瓜冇基因改造，在溫室瓜棚培植，並非傳統地下纏藤栽種，有專人照顧，最少要九至十個月先有收成，少啲心機都種唔出咁大個瓜，好矜貴。
mailto:[email protected]