港股昨日大升，立即收復周一失地，仲有突，恒指高收17885，大升631點，只要上番去10日同20日線，形勢又可轉穩。
上升正股有750隻，上晝大價股先發力，下晝升勢擴散，百花齊放場面又再出現，頭10大上升股，升幅由20%到91%不等，其中最大成交係濱海投資（8035），由0.38元掃到上0.46元，大升8仙，升幅21%，成交更大增到2.62億股，此股復牌後話明會有注資同變身概念，收集兩個多月後，升勢再起，有機會重遊復牌後0.59元高位。
股價大升，若唔係有消息刺激，就係大偏低，好抵買，今時今日，仲有好多「寶藏」待君發掘，呢類股份，日後升幅又係幾成，甚至以倍計。近期由創業板轉主板的弘海（065），就係寶藏中一粒明珠，隨時大發光芒。
4月21日，推介弘海，當時股價0.535元（經5送1紅股調整），6月22日最高升到0.85元，升幅58.8%，現時又回落到0.70元水平，又係低吸良機，迎接第2個大升浪。
集團業務好單純，主要係工業（生產塑料編織袋）同礦業（煤炭貿易同開採），業績穩步上升，08年（12月年結），完全冇受金融風暴影響，營業額3.64億元，升83.6%，溢利5095萬元，升41.2%，每股盈利12仙，經送紅股調整後為10仙，往績PE不足7倍，息率4.5厘。
兩瓣業務表現俱理想
09年首季，集團營業額7191萬元，減5.3%，股東應佔盈利1206萬元，升20.3%，由於季節性關係，首季盈利會較為少。去年4個季度盈利分別為1003萬、1081萬、1195萬及1815萬元。
集團兩瓣業務都有良好進展，毛利率較高的大型編織袋業務開始提供全年貢獻，加上原料成本大為降低，盈利會更理想。煤礦方面，煤炭貿易收益穩定，地下煤礦挖掘亦已伸延到地下第8層，今年第4季即可投產，年產量120萬噸，以現時煤價計，每噸最少賺100元，每年利潤1.2億元，弘海應佔權益超過6000萬元。
09年估計盈利8500萬元，每股盈利16.7仙，以7倍PE計，股價已可見1.17元。2010年度，煤礦提供全年收入，每股盈利可上升到28仙，以1年為期，目標價更可調升到2元水平。
郭兆誠