大班鄭經翰牽頭創辦嘅雄濤電台，一直只聞樓梯響，不見人開咪，八方聽聞開台一事近日有進展，雄濤已獲試播牌照，市民今年內有得聽。
既然開咪有期，好應該慶祝吓，大班前晚約咗煲呔、雄濤股東李國寶，各自攜眷，一行六人到上環尚興食潮州菜。寶哥哥架Benz同特首AM90座駕七人車泊在門外，9點鐘左右，有個交通警到場趕車，特首保鑣即時上前表露身份，交警可以收工。
尚興係名人飯堂，星爺係常客，最出名係堂灼響螺，六個人食到9點幾鐘埋單，寶哥哥仲有打包由侍應放入車尾廂。煲呔伉儷率先離開，寶哥哥同大班兩對夫婦前後腳走人，大班冇揸車，同太太前港姐勞錦嫦截的士返歸。
料11月試播
大班強調當晚唔係慶祝開台，只係一般朋友飯局，席間風花雪月，「絕對冇談正事。」佢話雄濤已獲試播牌照，最快11月試播，會派數千部數碼收音機畀市民試聽，初時七個台只播純音樂作技術測試，冇主持開咪，目標係明年底正式開台。