科大成功羅致華人諾貝爾物理學獎得主李政道之子李中清做人文社會科學學院院長，李院長5月履新，噚日開記招講鴻圖大計，小道消息指科大為爭取見報機會，事前特別向其他大學打聽，噚日有冇重大消息宣佈，確定clear先安排李院長隆重登場。可惜機關算盡，算漏咗臻美交接同港大SPACE講申辦私立大學嘅飯局，真係人算不如天算。
其實有麝自然香，李院長大計包括同加州大學洛杉磯分校、北大、維珍尼亞大學合作，又會請著名作曲家盛宗亮開辦音樂課程，亦計劃同理學院、商學院合作成立中國環境及能源政策研究中心，總之計劃多多，喺2012年或之前重整本科課程，配合「三三四」學制需要。