o靚模推出水着寫真踩過界，搞到今年書展波濤洶湧，但都敵不過群情洶湧，出版《夏之盛放》寫真集嘅SCEH噚日表示，寫真集中幾個o靚模應該唔會去書展做宣傳，亦唔會搞簽名會。電車男知道呢個消息，可能好失望。
讀書人批評o靚模入侵令書展淪為「人肉波波池」，有網友發起反o靚模行動，甚至計劃到場抗議。八方聽聞有關方面十分緊張，本來想喺書展搞簽名會嘅計劃都打退堂鼓，恐防成為眾矢之的，得不償失。
SCEH發言人話，《夏之盛放》兩版共二萬本7月初已幾近售罄，估計現時市面僅餘不足400本，相信下星期三書展開幕前會沽清，「由於冇書喺書展賣，所以唔使去做宣傳。」雖然冇簽名會，不過o靚模有自由去「行」書展買書，即係有機會在書展會場現身，唔死心嘅電車男，可以去碰運氣。