奧雲（圖）一加盟曼聯，坊間經已有人用容祖兒首《16號愛人》嚟寸佢：「我以前是冠軍，怎會慣，做後備『奧雲』（愛人）。曾經，也上到最高，逐漸滑落，谷底的暗，看見未來，雙腳已在震……」家陣奧雲佢仲落實會做曼聯7號仔，真係問你死未。着得紅魔呢件7號波衫，個個都係猛人，就好似係白賴仁笠臣、簡東拿、碧咸同上手嘅「C朗」基斯坦奴朗拿度等。我求大俠唔敢話奧雲唔夠班，但佢真係有啲過氣囉，而且領隊費格遜簽佢返嚟，純粹係戥腳，件7號波衫着上佢身，無嗱嗱就由正選變後備，搞到呢件紅魔7號波衫downgrade晒，所以我求大俠好擔心會滯銷。