上個禮拜阿鳳過新加坡探親戚，係都要掹埋我去，見咁耐都未放過假，索性搵個替工頂幾日，當同Honey度吓假都好。幾十歲人先去遊埠，成個鄉下仔出城咁，同人講想食星洲炒米，畀佢個親戚肥版孫燕姿笑到面黃，情形同揚州炒飯一樣，只係一樁美麗嘅誤會。阿鳳就最緊要行街Shopping，一行人去到媲美烏節路咁旺嘅新達城，令黃師傅讚嘆嘅除咗獅城道路規劃得好，最印象難忘係停車場入面每條柱，都印咗唔同嘅昆蟲、動物圖案，起初以為裝飾之用，肥孫懶有權威咁講解，原來大型停車場都有呢類圖案，作用係將車場作區域劃分，等車主更易入腦，例如「蝴蝶J13」、「雀仔A80」等，簡單又好記，唔會好似阿鳳上次喺又一城同MegaBox咁，喺停車場入面蕩失路搵唔番架車。
（大話星遊之一）
文：黃師傅