日本國寶級球員中村俊輔唔踢波走去教書，仲要搞埋師生戀？唔好誤會，呢個只係佢今夏喺一隻廣告歌內嘅角色啫，喺個MV裏面佢扮演一間中學嘅舊生兼足球校隊教練，而且仲喺後生過佢17年、飾演學生嘅14歲美少女川口春奈露兩手，搞到川口春奈有絲絲傾慕，真係恨死隔籬。
女主角川口春奈夠可愛
我求大俠最鍾意睇嗰隻P字頭健康飲品嘅廣告，嗰班代言人好似係森高千里、宮澤里惠、中山亞薇梨同埋綾瀨遙咁，個個樣靚身材正。最新代言人川口春奈就青春無敵同埋夠晒可愛，早排由佢主演、仲有本地人氣歌手G.E.M鄧紫棋負責聲演嘅廣告喺香港hit爆，隻由Hi-FiCAMP主唱嘅廣告歌《一顆大淚珠》仲唱到街知巷聞。
喺P記呢個廣告嘅延續版《大步向前》（亦即係《一顆大淚珠》嘅下集），現年31歲嘅中村俊輔就獲邀演出呢隻歌嘅MV，仲化身學校足球隊嘅教練，喺偷睇學長練波嘅川口春奈面前大晒球技。
廣告天王經驗豐富
中村俊輔咁話：「對我嚟講，做戲真係難過踢波好多。我教班演員踢波，佢哋都踢得有板有眼，但佢哋教我做戲，我就做極都做唔好。」不過，我求大俠覺得係中村俊輔佢謙虛啫，查實佢喺日本球壇係廣告天王，拍過無數咁多個廣告，例如係熱爆全球嘅足球Game同埋體育名牌「3間」，而且仲同日本人氣女星上戶彩合作過，所以點會唔識做戲呀？話時話，我求大俠仲知道，川口春奈之前向日聯球員請教足球技術，所以應該同中村俊輔合作愉快。
中村俊輔喺今個夏天嘅好事一單接一單，首先係帶領日本國家隊出線明年南非世界盃決賽周，之後再以自由身身份過檔西甲愛斯賓奴，家陣仲做埋MV男主角，真係連C朗都冇得同佢得揮。不過，中村俊輔年紀始終唔細，都好應該為退休後打算吓，話晒佢有咁多出鏡經驗，真係可以喺掛靴後，好似前輩武田修宏咁轉戰藝能界拍日劇，話唔埋有機會同川口春奈再續前緣呢！
知多啲
呢隻P字頭嘅飲品係一種運動飲料，標榜與人體體液相似，所以能迅速補充水份同埋電解質。佢哋向來都搵啲索爆嘅美少女嚟做代言人，經典人物有宮澤里惠、中山亞薇梨同埋綾瀨遙，但間唔中都有男性代言人，就好似係福山雅治、SMAP同埋中村俊輔等等。
中村俊輔最新飲品廣告有得睇：
http://www.youtube.com/watch?v=Wlk-jlYQio0
投「愛奴」變7號仔
今夏同蘇超些路迪約滿嘅中村俊輔，禮拜一喺7,000球迷嘅歡迎下出席愛斯賓奴嘅記者會，仲同會長丹尼爾山齊士一齊高舉，燙有佢中、英文姓氏嘅7號球衣，正式成為愛斯賓奴一分子。
原本31歲嘅中村俊輔可以返母會橫濱水手效力，但聽聞水手只係畀到佢年薪160萬美金，結果佢就揀咗愛斯賓奴，仲簽咗一份年薪170萬美金嘅兩年合約。有人認為中村俊輔為錢而唔返日聯比賽，好冇義氣，,但我求大俠認為佢已屆退休之齡，趁有叫價能力盡量銀都好正常。
更何況，中村俊輔去西甲比賽，有機會同當今3大球王基斯坦奴朗拿度、卡卡同埋美斯交手，呢啲機會可以話係百年一遇，而且對提升佢或者日本國家隊嘅戰力亦好有幫助，所以我求大俠覺得佢作出咗明智嘅決定。
