政府成日叫人唔好亂打999，電視廣告更教大家唔好濫用消防同救護服務，否則隨時阻延救援真正需要緊急服務嘅市民。人命攸關，可大可小，連消防處一哥盧振雄都講過，曾經有市民被蚊咬、便秘都call白車，反映濫用白車情況嚴重。但勢估唔到，今時今日重建收樓都要call消防call白車。邊個咁玩嘢？之唔係噚日搞掂咗深水埗K20至23項目最後一個重建戶嘅香港房屋協會囉。
呢個重建項目，剩番福榮街494號一樓閣仔舖嘅新忠花店老闆黃乃忠死守到最後。噚日到期收樓，當局自然唔手軟，前晚經已有大批便衣到場踩線，房協保安又一早徵用咗花店隔籬原來係車房嘅地舖，做臨時保安中心，派兵駐守，確保萬無一失。
前門反鎖疑被困
到噚日朝，大批房協職員同保安一早駕臨。九點未到，幾部火燭車同白車仲好大陣仗咁到場，幾個消防員落車，有位仲拎住把大鉸剪。現場嘅記者初時以為，消防員係嚟破門，幫房協收樓，救護員就係以防有人受傷，到場戒備。點知佢哋留咗大約15分鐘，就拉隊走人，有位幾分似王喜嘅消防員哥哥仲打手機，大意問電話另一邊嘅人：「係咪你哋call消防？家冇事喇嘛？」
八方後來問番消防處同房協。原來，黃生同一班嚟聲援佢嘅街坊同義工，用花牌封住個正門鐵閘，坐喺條街度抗議。但你有花牌陣，我有後門捐，房協一早已經搵人喺隔籬舖位循後樓梯上去天台，再落番新忠個舖位收樓。據消防處發言人講，當時喺舊樓入面嘅房協職員打返公司，話下面前門被人鎖咗，於是房協總部就報警，話懷疑職員被困。
消防話，朝早8點45分奉召到場，但到場後發現，隔籬舖個閘一推就開，入面嘅房協職員亦根本可以從後門自由出入，唔存在反鎖問題，惟有收隊走人。事件列作「一場誤會」。房協發言人就話，確係有同事call過消防，不過最後證實冇事。
大家千祈唔好睇小呢個「誤會」。房協係咁意一個電話，消防處就派五部車嚟做雷霆救兵，升降台、細搶、電單車、白車全部出齊。八方建議，下次政府拍宣傳片，可以考慮用今次事件嚟做實例，教人唔好濫用消防救護服務。
mailto:[email protected]