上周本欄提過，港股踏入7月中，跌勢將見真章。果然不幸言中，大市三扒兩撥已跌至17200水平，昨日雖然成交只有525億元，但要留意H指跌幅高達2.8%，表現跑輸大市。H指轉弱，對港股後市並非好現象，散戶們宜留意。
現階段仍留在股海打滾之輩，多數都係見慣世面，對港股調整加深不會大驚小怪，只要不破壞牛市升浪，調整加快其實係好事，總好過大牛皮悶死人。
15元支持較大
跌市有時唔可怕，因可趁機低吸心水愛股。光大控股（165）上月升至20.45元後隨大市調整。昨跌逾3%，收報17.68元，失守50日線17.90元，走勢明顯轉弱，唔排除後市跌勢進一步加快，如果16元守唔住，或要回補5月初介乎15.28元至15.52元之上升裂口，估計股價跌近15元水平會有較大支持，暫時戒急用忍，等待買入良機。
光控手上兩大業務光大銀行及光大證券仍未上市，由於內地股市轉旺，日後不愁無發揮機會，不妨列入低吸名單。
方星俠