余大狀身形苗條，唔知係咪因為咁，畀食環署睇中，噚日邀請佢去試食，為有營食肆做評判畀吓分，無端端做咗政界味之天使。查實余大狀噚日上車之前都唔知食環署呢個試食行動有乜目的，但佢又膽粗粗咁跟上車，睇嚟佢都幾為食。
原來食環署為咗鼓勵市民食得更有營養，特別搞咗個有營食肆比賽，而且仲分門別類，例如蔬果類同海鮮類，咁啱余大狀獲編為海鮮類嘅評分嘉賓，好多人都羨慕佢有口福。佢嘅評分標準離唔開餸菜係咪少油少鹽等等，但試食完先發覺做評判唔係食到好多嘢，好多時都係食一啖就要放低，絕對唔會好似電視啲飲食節目主持人咁，捧住個大肚腩走人囉。