證監會法規執行部前執行董事李顯能（AlanLinning）又再跳槽，最近獲美國盛德國際（SidleyAustin）律師行委任做合夥人。「拉鏈先生」離開證監只係3年，又有新工，可見做過證監都唔愁出路。
李顯能加盟盛德
1866年喺芝加哥成立嘅盛德律師行，家陣威震全球，皆因美國現任總統奧巴馬喺89年哈佛大學法學院讀書嗰陣，就喺盛德實習時認識第一夫人米歇爾（Michelle），兩人日久生情，92年結婚。
盛德咁勁，李顯能亦唔弱，佢89年加入麥堅時律師行，專長商業訴訟同埋企業糾紛，01年11月跳槽證監，直至06年5月先轉戰摩根大通，出任法規部董事總經理。佢喺證監任內最經典個案，係04年起兩度勒令投資顧問羅德利（TowryLaw）就銷售不當基金問題，向2000客戶賠償6.55億元。立法會會計界議員陳茂波舊年就引以為例，希望證監幫幫雷曼苦主。