日本歌手倉木麻衣同容祖兒（Joey）係今年港台太陽計劃榮譽大使，噚日佢哋聯同楊千嬅、謝安琪和古巨基等歌手喺港台宣揚愛廣東歌，過檔到英皇嘅基仔同金牌大風嘅舊同事仲有傾有講。
最近傳金牌拖欠歌手薪金，鄧麗欣同吳雨霏（Kary）要向公司追討，令此事成為太陽計劃焦點。方力申話可能啲人話自己係太子黨，所以冇咁嘅事，仲爆鄭中基（Ronald）返公司通常都係打機。Kary噚日就話：「我啱啱先出咗上個月糧，出糧要老闆簽名，有時老闆唔喺香港簽唔切，會遲一、兩星期。」
謝安琪避老公
至於傳Ronald接管行政，兼飛起雷頌德同傅穎，Kary亦否認。金牌大風高層陳輝虹就重申：「Ronald唔會搞行政，公司運作正常，有時藝人做完嘢，過程中一啲票據有出入，公司要幫藝人追討番。」
張繼聰同太太謝安琪（Kay）呢對夫妻出席同一場合表現得好避忌，唔刻意走埋一齊，Kay話：「又唔係家庭聚會，唔一定要影合照。」講到之前陸永喺棟篤笑騷度話佢整容，Kay話：「笑料啫，預咗佢玩我。」
千嬅晒定情鏈
另外，千嬅早前經常戴住男友丁子高送嘅情侶鏈，鏈墜仲係以兩人英文名字頭R（丁嘅英文名Real）同M（楊嘅英文名Miriam）組成，千嬅噚日都有戴住，仲好風騷咁問記者係咪呢條，佢話：「我有好多鏈㗎喎，朋友送嘅生日禮物，我犯太歲，朋友話黑鑽可以辟邪嘛。」不過千嬅就死都唔肯同馮仁昭講究竟係咪丁子高送。
