天氣酷熱，氣溫高漲，每日黃昏時間坐車自西隧過海，一出隧道，由W酒店計起，一路去到「曼克頓山」（近美孚新邨），都可以聞到一股臭味，透窗而來，車內冷氣不能掩蓋之。呢股臭味，相信係自九龍西部海面而來，不知長沙灣、大角嘴、尖西一帶向西住宅嘅居民是否聞到呢？
餐飲M住在天后廟道，律師W住在賽西湖，兩人都話九龍西沿岸雖有臭味，或者唔夠將軍澳堆填區之臭味遠播，因佢兩人在家打開窗門遠望九龍東，有時臭味迎風而至，佢哋相信係自將軍澳堆填區吹過嚟港島東半山嘅。隔咁遠都聞到？餐飲M話：「在《蘋果》大廈、TVB大廈內工作嘅老友記，豈非日日聞到惡臭？」咁就要問吓楊社長至得，唔敢講。因為如此，公子L對西灣河/嘉亨灣旁的高爾夫球練習場（drivingrange）結束營業，搬去將軍澳一事，甚為惆悵，對港島居民而言，西灣河高球練習場方便無比，但因為臨時租約到期，球場一定要搬，但搬走之後，呢幅臨海官地有乜嘢其他即時用途，暫時不知，但相信會繼續丟空一段時間。公子L講：「我邊會去將軍澳練波吖。」
午飯之後，行經戲院里，心思思想話擦鞋，但見行人甚多，擦鞋檔有人等候，於是作罷，呢度以前只有擦鞋檔及報紙檔，但皇后戲院拆卸後，地盤外有石躉，可以掛物，於是吸引到其他小販在此擺檔，左丁山就見過有人在此收購電話，亦見過「SPCA」在此擺檔，就快變成小販里。皇后戲院冇咗，中環失去一個重要「集體回憶」，甚為可惜，但今時今日已無人願意走入大戲院，皇后似係史前恐龍，在二十一世紀被淘汰，無話可說。記得先父以前講過，四五十年前嘅皇后戲院係英語電影作慈善首映之必然場地，因為港督只係肯去皇后睇戲，凡係想請港督到場者，非選皇后首映不可。當時國語片未算一流，邵氏要猛咁游說皇后，要求皇后放映邵氏電影，後來嘅嘉禾亦然。他日見到蔡瀾、杜惠東呢兩位電影掌故專家，可以問多啲有趣資料。