最低工資立法在即，但係工會嘈咗好耐嘅標準工時就未有着落。阻力未必係來自商界，好可能「真誠為香港」嘅民建聯都唔會支持。八方唔係老屈保皇黨，工會提出嘅每日8小時、每星期44小時標準工時，民建聯自己都做唔到。
八方喺勞工處網站到，民建聯立法會議員葉國謙上星期請議員助理，要求應徵者有專上教育程度，月薪9,000至11,000，工作時間朝10晚11，即係每日13粒鐘；每星期做五日半，即係每星期71.5粒鐘，同大廈看更有得揮。
成功爭取每日工作13粒鐘嘅民建聯，唔知幾時開始戀上長工時。八方記得，作為港區全國政協委員嘅民建聯成員林淑儀曾經講過，基層勞工生活冇保障，係建設和諧社會嘅絆腳石，又話低工資、長工時係非常唔合理。經常有人話民建聯係香港共產黨，唔係冇原因嘅。