鄭伊健噚日同陳小春、余安安、葉璇喺數碼港拍攝寰亞投資的新片《飛砂風中轉》，伊健同余安安飾演母子，葉璇同小春演夫婦，喺戲中仲會有好多咀戲。
之前有傳伊健被女友蒙嘉慧逼婚，感情亮紅燈，又有報道話佢哋好事近去酒店睇酒席，伊健噚日話：「兩樣都唔係，家咪拍拖階段囉！」對於舊愛梁詠琪（GiGi）獲老外男友Sly求婚，伊健話：「如果係真，咁係件開心事，會祝福佢。」佢亦戥陳慧琳已為人母高興。陳小春爆伊健有諗過結婚嘅事，小春話：「佢點會冇諗？我同佢傾偈有噏過吓，佢話呢段路（結婚）始終一定要行。」
GiGi希望伊健開心
另外，GiGi噚日喺荃灣出席港台活動，佢話家同拍拖3年嘅男友感情穩定，亦承認有傾過結婚問題，但一切都需要時間考慮，佢講明唔心急結婚，亦唔會做未婚媽媽。對於伊健隔空祝福，GiGi話早前被問及伊健婚訊都送上祝福，大家都會希望對方開心。
此外，問小春幾時娶應采兒？佢即偷笑，記者笑佢係咪求婚失敗，佢話：「你好似知好多嘢，如果我真係結，唔會喺香港擺酒，寧願喺外地。」