「點解點解永冇放工，點解點解老細冇用」、「天星鐘聲冇晒記憶，西九諮詢冇晒意義」、「點解高官猛咁廢噏，政黨呃票冇句老實」……歌詞啜核抵死，句句到肉，唔少市民都話好有共鳴。香港投訴合唱團繼7.1後再度出擊，噚日出動二十幾人，走勻西九、尖嘴同中環，用歌聲唱出對生活、社會狀況同對政府施政嘅不滿。
合唱團仲夥拍藝術館關注小組，用歌聲唱衰香港藝術館，炮轟展覽《路易威登：創意情感》擺明幫LV賣廣告。合唱團創辦人之一嘅方韻芝話，佢哋唱通街唔單止投訴：「希望將藝術同生活融合，令藝術不再高高在上。」合唱團下星期日仲會喺天水圍同東涌踩場，市民有興趣可以加入唱埋一份。