小甜甜爭產官司上星期五證人作供完之後，要等到9月底先結案陳詞，令唔少人霎時間冇咗個茶餘飯後嘅話題。邊個輸贏家言之尚早，但一班有份打官司嘅大狀，就好肯定係大贏家。梗係啦，無論邊個打贏官司，佢哋嗰筆好襟計嘅律師費，都必定袋袋平安，自然諗起都想笑。
十幾支貴酒埋單10萬蚊
為咗好好慶祝，陳振聰班大狀團包括IanMill、麥至理、夏利士等，上星期五一上完庭，十幾人夜晚即刻擦餐勁，去咗城中最有名嘅意大利餐廳，中環蘭桂坊TuscanybyH，包咗個私人宴會廳慶功。身為老闆嘅哨牙通陳振聰當然唔少得，拖埋老婆譚妙清到場。
據講當晚在場人士個個情緒高漲，不停咁開名貴紅酒、白酒豪飲，可能見有大老闆哨牙通在場，所以唔貴唔叫，包括KrugChampagne、89年GajaSpress、92年PulignyMontrachet、94年Dominus，每支價錢3,000蚊至7,000蚊夾夾埋埋開咗十幾支貴嘢。結果到埋單計數時盛惠10萬蚊。
當大家以為哨牙通會找數，點知係IanMill掏荷包出嚟埋單，原來哨牙通只係以「嘉賓」身份獲邀出席，主角係一班大狀，所以找數都應該由大狀自己畀番。八方相信IanMill都唔會計較，事關呢位英國御用大狀，嚟咗香港幾個月，嗰筆律師費相信八位數字走唔甩，區區埋單10萬蚊又算得乜。
有知情人士透露，陳振聰散席之後急急腳走人，會先飛去日本散吓心，幾個仔女同老婆譚妙清都會離開香港放暑假，係咪會滙合一齊玩就未知。
八方搵咗TuscanybyH嘅星級名廚老闆Harlan，想問吓佢知唔知點解哨牙通嗰晚唔找數，佢話係貴賓私隱，唔可以透露。
相比之下，爭產嘅另一方龔家就繼續慳家本色。上個月龔仁心三姊弟作完供之後，只係去咗灣仔老牌扒房樂意牛扒屋低調咁食一餐，龔醫生仲同記者講，已經係佢歷來食得最豪一次，以慰藉家姐龔如心在天之靈。
mailto:[email protected]