當追隨者當咗你係神，無論你做乜，都可以成為榜樣。好似近年減產、將《投資者日記》變咗做周記嘅曹仁超咁，最近就喺個訪問入面創造咗「曹氏方言」，要喺股海明燈身上學番一招半式，首先就係要破除傳統嘅語言要求，參透呢種方言嘅奧秘。
「香港嘅精子剛剛上處」
曹sir寫專欄可以寫到變咗一份報紙嘅台柱，影響力有幾大唔需要八方多講，呢幾年內地對財經知識好渴求，唔再需要一日做十幾個鐘嘅曹sir不忘慰藉神州嘅股民，喺內地財經網講投資經，一口開就用一種同普通話有幾分似嘅「曹氏方言」答問題，用書面語方式講廣東話，例如「因為香港嘅精子剛剛上處嘛！！」呢類，令唔少網友以為老曹做緊《性本善》，鏡頭影吓講緊普通話嘅主持人，唔單止冇笑，仲好似好明白咁。
呢段片段放咗上網之後迴響甚大，廣大網民睇番字幕先知嗰句原來係「因為香港的經濟剛剛上去嘛！」可見曹sir嘅語言能力已經進入一個創造語言嘅神級境界，內地同胞要學，仲有漫漫長路。想睇番，可以上 http://multimedia.caijing.com.cn/2009-06-12/110183592.html