近排《捉鬼敢死隊》、《變形金剛》打破電影改編遊戲宿命，質素高銷量亦唔錯；而將於後日在港上畫嘅《哈利波特－混血王子的背叛》亦都全機種制霸推出家用遊戲。立體動作，哈利波特冒險之餘，閒時仲可以打吓波、煮吓魔藥自己啪，仲首次加入二人對戰玩法，率先體驗劇情之餘，可以搵個混蛋朋友齊齊玩，我都忍唔住拎住支外賣木筷子大嗌：「去去，武器走！」
文：阿洛
佛地魔侵襲
以下呢段含有少少劇情，準備入場睇戲又連基本劇情簡介都唔想睇嘅，回頭是岸，請跳過呢一段！
首先，混血王子唔係吳彥祖，今次故事主要係講哈利死對頭佛地魔力量越來越強，而食死人亦開始對霍格華茲虎視眈眈，更有暗殺鄧不利多嘅計劃。而鄧不利多為對付佛地魔，就搵嚟老死兼魔藥專家史拉轟教授幫拖，而原本唔多願教魔藥課嘅石內卜，終於如願當上黑魔法防禦課老師。同時，年輕人都開始談戀愛，哈利同榮恩個妹金妮越撻越熱烈，榮恩同妙麗亦開始發展無綫劇集式寃家變情人嘅愛情故事。遊戲中連呢方面劇情都會涉獵，例如有小遊戲就係幫榮恩解決愛情煩惱。總括嚟講，我覺得睇完戲玩會投入啲，但係見到妙麗成長得亭亭玉立，我隻手又忍唔住拆咗隻Game嚟玩，點算？
一轉身射個三分波
故事背景哈利仔入讀霍格華茲第6年，有睇小說嘅都知，今集會係最後一屆魁地奇比賽，要好好享受打波嘅樂趣。玩法同電影一樣，哈利擔當葛來分多嘅搜捕手，以搶到粒金探子為目標，玩落速度感幾正，有賽車GameFeel，又有運動Game感覺。今集仲有樣勁，係哈利波特遊戲中首次加入一對一對戰Mode，一邊用魔法、一邊左閃右避，而喺對戰Mode中可以使用嘅魔法咒語種類，亦會隨住遊戲完成度而解封，企喺個台上面，就要有我要打十個嘅決心！
跟魔書溝魔藥
家啲Game為增加耐玩性，少不免都要儲吓嘢，玩家扮演嘅哈利可以自由探索霍格華茲校區，包括占星塔、史拉轟教授設於地牢深處嘅魔藥教室，同埋葛萊分多學院等房間、大廳，戲中著名景點全數登場；喺各場景之中，仲會隱藏住唔同嘅徽章，合共超過150個畀你慢慢搵。而同時今集關鍵更有混血王子本魔藥書，玩家就可以好似對住烹飪書學煮幾味咁，跟住程序調出各種效能嘅魔藥，魔法廚房，溝咗先講！
Profile
遊戲：《哈利波特：混血王子的背叛》
機種：PS3、XB360、PC
發行公司：EA
類型：ACT
人數：1-2人
送嘢！答啱問題有Game送
有咩好得過唔使錢就有Game玩？家有機會！華納影視與ElectronicArts送出10隻《哈利波特》遊戲碟（XB3603隻、PS35隻、PC版兩隻）給《蘋果日報》讀者，只要答中以下問題，連同回郵信封寄往：將軍澳郵箱65264號，信封面請註明「《蘋果日報》哈利波特」，便有機會得到。（獎品先到先得，如有任何爭議，最終決議權歸華納影視，《蘋果日報》概不負責。）
問題
在電影《哈利波特－混血王子的背叛》中，誰是哈利從魔藥教室借走的高級魔藥書的主人？
a. LilyPotter莉莉波特
b. SiriusBlack天狼星布萊克
c. TheHalf-BloodPrince混血王子
d. LordVoldemort佛地魔