股神畢菲特早兩日喺ABC節目《美國早晨》話，美國要第二輪振興經濟方案，不過佢堅信美國捱過今次難關之後，可再闖高峯。
信美國有翻身之日
除咗評論美國經濟，股神仲用玩橋牌嘅心得比喻人生，畢菲特話，學識同拍檔合作同相處之道，就可以無往而不利。更重要係，要喺上鋪牌嘅經驗中，學習點去應付之後嘅牌局，所以要對整個過程非常專注。呢個道理放喺人生同投資都好啱用！
金融海嘯下，好多畢業生覺得前路茫茫，股神就勉勵佢哋話，美國可以債務纏身，美元都可以跌到四腳朝天，但係無論四周環境變成點，做人最緊要肯學，好好裝備自己係最好嘅自救方法。佢仲叫讀唔成書、攞唔到學位嘅後生仔唔好灰心，因為有料就唔怕冇出路。正如佢所講，人生可能經歷好多次衰退同埋泡沫，但最緊要係依然對前景充滿信心。所以話，股神即係股神！