老牌工業股德昌電機（179）嚟緊29號舉行嘅股東會，今年唔再用舊年嘅金鐘萬豪酒店宴會廳，反而好罕有咁喺中環私人會所「香港會」進行。身為德昌股東嘅「股壇長毛」網上股評人DavidWebb噚日撰文，話「香港會」向來都係中環政商界精英嘅私人聚腳地，會所規定「穿T恤、牛仔褲、運動服、短褲、踢拖者一律免進」，德昌竟然租呢度搞股東會，實在相當搞嘢，皆因股東不嬲都唔太悉心打扮，只係志在投吓票、問吓問題，好多時肯捧場都係「為食」，有唔少老太太仲着住睡衣現身㖭。
Webb批評，受人所託即將出席德昌股東會嘅代表，根本未必知道「香港會」嘅着衫規矩，因有關內容冇喺港交所（388）公告欄內披露，萬一到時着得樣衰衰，德昌咪有理由趕股東離開？查實只要股東衣着同行為舉止冇犯法，佢出席股東會嘅權利就唔應該被監生剝奪，否則隨時有「流會」危機喎。
香港會着衫規矩嚴
咁點着先好？Webb話，千祈唔好搵件「我愛德昌電機」嘅T恤。佢仲畀多幾個溫馨提示，記住會場內唔畀用手機，亦唔好掛住傳SMS或者同人吱吱喳喳，總之入到大場面，純粹舉手發問就OK啦。
李華華
mailto:[email protected]