我求大俠細細個好鍾意食大腳板雪條，貪佢消暑、多花生兼係名牌公司產品，但近年質素越嚟越差。查實，日聯大阪飛腳同呢隻大腳板好似，成績又係越嚟越差，上年先攞完亞冠盃咋嘛，點知踢到班隊員殘晒，搞到今季聯賽脫晒腳，啱啱主場1:4慘輸畀清水心跳。家陣佢哋唔再係一對靚嘅腳板，係起晒水泡、紅紅腫腫嘅「臭腳板」囉！
2,000球迷鼓譟發爛渣
大阪飛腳上年喺亞冠盃封王幾咁風光，不過班國腳要應付世界盃外圍賽，又要踢世冠盃，再轉戰開「咧」嘅日聯，遠藤保仁等主力唔踢到殘就有鬼啦！上周六主場對住清水心跳，淨係靠曹宰榛可以破到蛋，最終都要輸1:4，聯賽3連敗真羞家。賽後班球迷梗係鼓譟起上嚟啦，聽講場波完咗之後，有成2,000個擁躉賴死唔走，喺度抗議球隊今季戰績咁差。
我求大俠又覺得唔可以怪班球迷嘅，自己愛隊威慣風光慣，點忍心見到家成績咁差？好似大腳板家陣少咗好多花生，我都少咗幫襯㗎！無他嘅，飛腳目前排第7，落後榜首鹿角已經19分，今年亞冠盃又提早16強出局，球迷點會唔心痛？
遠藤保仁傷完又搏殺
查實飛腳上季有射手巴爾喺度，球隊真係踢得好順，之後呢位巴西仔離隊，揾盧卡斯施維連奴頂替，似乎差好遠！盧卡斯施維連奴暫時喺聯賽只入一球咁大把，搞到遠藤保仁同加地亮等踢到殘晒，久唔久傷一鑊，傷完冇耐又焗住再踢，戰績又點會好呢？好似上周六對心跳，遠藤保仁咪又係啱啱傷癒復出咋嘛。
講開又講，「香港腳」呢種病係會傳染嘅，呢邊大阪飛腳近況衰到冇人有，連另一支大阪代表、日乙嘅櫻花，周日都喺榜首戰主場3:4輸畀湘南比馬，直頭上演一幕《大阪冧檔記》。
知多啲
大阪飛腳近年聯賽都排喺前列，就算跌出前3名，都總有啲斬穫。好似上季聯賽雖然排第8位，但喺亞冠盃決賽，兩回合就以5:0大炒阿德萊德聯捧盃；仲有日皇盃決賽，加時憑播戶龍二一箭定江山，贏埋柏雷素爾做盟主！至於05年，飛腳都攞過聯賽冠軍，所以同今年季初成績相比，唔怪得球迷唔收貨嘅！
