喺田徑跑道上多次奪金嘅香港飛人蘇樺偉，噚日出咗本口述自傳《赤道上的金牌》，講佢28年嚟嘅奮鬥史。書名講嘅「赤道」，原來係指紅色嘅田徑跑道；赤道滾熱辣，亦代表蘇樺偉對跑步嘅熱情。偉仔喺書中話，有今日嘅佳績，都係全靠背後支持佢嘅父母同教練。當年教練喺一個聯校運動會發掘偉仔，經過一年訓練，就代表香港參加殘奧，仲攞埋4乘100米接力嘅金牌㖭。
書中部份內容由偉仔口述，有人執筆，唔好以為口噏噏好容易，偉仔認為仲難過落場跑步，因為要講番啲事件嘅前因後果，難度一啲都唔小。噚日偉仔媽咪蘇太亦有現身，佢話冇諗過個仔可以攞金牌、出自傳，又勉勵阿仔唔好驕傲，要繼續努力。