「巨無霸」奧尼爾幫姚明改新花名！呢位剛加盟騎士嘅37歲中鋒上周六晚同快艇後衞白朗戴維斯、速龍後衞卡達朗，喺北京出席球鞋贊助商嘅宣傳活動。生性活潑嘅奧尼爾當然唔會放過搞笑機會，話為咗要俾人敬重，一定要學埋「ChineseKungFu」（中國功夫）咁話，之但係佢嘅「籃底霸王」本領威震天下，就連籃框都俾佢輕易拉爆，如果呢位4屆NBA總冠軍得主學識埋功夫咪更厲害！
講到中國中鋒姚明嘅腳傷，奧尼爾就好有心咁話期望姚明可以早日康復，可以再同佢同場較量，仲大讚姚明可能係「中國籃球史上最佳球員」，無論鬥心、技術、品格都非常之好。鬼主意多多嘅奧尼爾仲幫姚明改咗個新「花名」，讚譽打法聰明嘅「中國巨龍」為「大智慧姚明」。我求大俠都非常同意奧尼爾嘅講法，姚明對中國籃球發展真係好重要，佢嘅打法剛柔並重，喺NBA算係異數，如果真係因傷退役確實可惜。