心思思想話放短假，去泰國旅行四五日，但見到最近泰國紅衫軍（他信派）重現街頭，又驚驚地，於是找泰國賓架Ｒ一問，賓架Ｒ話唔好去住，睇埋七月先啦。理由何在？賓架Ｒ話幾個月以來，文人總理阿披實真係冇料到，一位在溫室裏長大的英俊斯文男士，根本唔係泰國人的一杯茶。以前阿披實未上台，黃衫軍係要推倒他信派，而阿披實嘅紙上履歷──伊頓公學、牛津，實在巴閉，在蜀中無大將之下，姑且讓他一試。阿披實原來真係書生一名，無實際政治與管治經驗，做事既無權謀亦無駕馭群臣之才，於是政府立立亂，給他信派可乘之機，最近兩次議院補選，他信派大勝，故此紅衫軍又試蠢蠢欲動。賓架Ｒ話：「你去泰國呀，再睇定啲先啦。」
不如去印尼，好多年未去過咯，但印尼只係得峇里島好玩，雅加達交通好亂，市容不整，吸引力不大。賓架Ｒ講：「當公幹考察啦，西方報紙現在好捧印尼，認為金磚四國會變為金磚五國，侵埋印尼玩，BRIC變成BRICI，去睇吓印尼點樣火鳳凰重生都好。講起嚟就傷心，以前我哋泰國領先印尼甚多，現在俾印尼迎頭趕上，好心痛。」做私募基金高層就話去印尼放假兼考察啫，寫稿佬去印尼係想玩得開心，唔係搵入貨機會。遲啲，投資銀行會推出印尼指數ETF產品，到時再諗。
新加坡呢？地方細過香港，與香港好相似，悶啲喎。吉隆坡及馬六甲啦，好似有睇頭，吉隆坡勝在英文與廣東話通行，廣東菜夠新鮮，十分便宜，可以一行。馬來西亞本是好地方，可惜巫人政府自一九六九年後採巫人優惠政策，華人與印度人入大學以及投資無不受制於巫人，故此拖慢晒馬來西亞之發展。最近馬來西亞政府決定自2012年開始，政府學校恢復以巫語教科學及數學兩科，唔再用英文，理由係2003年開始試用英語教學，學生嘅數理科成績大跌，英語冇進步，故此恢復母語（巫語）教育。唔，孫明揚局長與田北辰快快搵人去深入研究馬來西亞經驗，在教學語言上再開戰場！