睇《頭D》，我會主觀認為電影同漫畫將飄移、AE86過度神話化，但當我親歷過今年喺新加坡舉辦嘅FormulaDrift後，見到全場近乎清一色日本車，冠軍更由「老爺車」AE86奪得，就知現實中「㗎車」先係甩尾嘅王道。
記者、攝影：徐影龍
鳴謝：TRC、GoodYear
甩頭甩尾等閒事
㗎仔將飄移玩到出神入化，喺日本就有全球知名嘅D1賽事，每年都有超級高手誕生，最鍾意將人哋冇諗過嘅車改嚟甩尾，好似Skyline、凌志等，成績同表現仲要鬼咁好，嚇窒唔少西方車手。西方車一味大馬力，有別日本車嗰種矯捷同靈活，所以飄移賽見得最多係「飛雞」Silvia200SX、AE86同RX-7。跟D1同級抗衡嘅甩尾賽事，有專為歐美同其他亞洲國家而設嘅FormulaDrift（下簡FD），09年第二度喺新加坡舉辦，總數37位車手參賽，喪改靚車更係睇到目不暇給。鬥車場地唔使大，幾個急彎望落簡單，真正比賽時就知難度有幾高，最刺激係首日練習同甩尾表演時，已經有幾架失控炒埋牆。記者為影相企得有咁近得咁近，嗰下「嘭」一聲炒埋自己身邊嘅危險感，的確幾震撼同刺激。過往喺珠海TrackDay睇房車賽，陣陣電油味撲鼻，飄移賽就換成強烈燒胎味，雖然視覺同聽覺夠晒刺激，但就難為咗個鼻囉。
AE86人車合一奪冠
今次新加坡FD以亞洲車手為主，除日本仔外，馬來西亞車手算係最頂班，其次就係新加坡同香港車手，GoodYear車隊最人才鼎盛，8位車手參賽，仲有全場唯一女車手㖭。
有別房車賽般鬥快過終點，FD飄移賽先以個人試圈表現，篩選出16強作單對單PK格鬥戰。睇住三十幾架車出盡力，務求到Point攞分（貼牆邊），有幾架搏得滯炒埋石牆，甩頭尾泵把已算小事，有啲成個車尾摺埋變風琴，好彩最後無人受傷。6位香港車手表現已經算唔錯，但由於僅得四次練習機會，跟手就要出場比賽，唔好話慢慢搵最靚嘅飄移路線出嚟，基本上熟習到條賽道已經好叻。等於你玩《GT5》，跑四圈就要金牌攞S咁，難度勁高。
香港有5位車手喺Qualifying已出局，僅得TRC嘅James以41分出線入到16強，一路下來，明顯馬來西亞車手稍勝一籌，尤其揸AE86嘅TengkuDjan，雖然Round1失控調頭0分，但Round2幾個彎位都到Point，最後以超高嘅82分進級PK賽。
TengkuDjan架AE86有四、五年比賽歷史，已經Tune到完美，加上當日狀態大勇，摸到入彎速度同弧度，PK戰中緊貼對手行車路線，放頭時又可拋離後車，表現穩定，好有當年「白色惡魔」嘅氣勢，最後亦順利奪得呢屆嘅FD冠軍，將AE86神話延續至新加坡。
賽後檢討：下次刨定啲胎
著名飄移車手James，對港人「16強止步」冇乜失望，「當初希望起碼入到8強，不過練習時間真係太少，排13位入16強都算OK喇。賽道設計對第一個彎有決定性影響，入得靚可以好順咁入埋第二、第三個彎，我最強係右彎，但今年改為左彎行先，所以發揮得唔夠好，當然一個全能嘅車手，應該可應付任何環境。最好笑係起步前刨胎時，俾工作人員指住鬧，原來大會規定唔畀Warm胎，望番其他車手，原來全部用刨好晒嘅胎嚟鬥，我同Ray仲專登運啲新胎過嚟，新舊胎咬地表現已經差好遠，下次都係刨定啲胎先，呢啲咪好嘅經驗囉，嚟緊12月馬來西亞比賽，香港車手表現一定會更好。」
