正生書院幫到沉迷毒海青少年，各黨派議員幾乎一致支持正生搬到梅窩，鼠王芬都唔例外，多次表態撐正生，噚日一不小心，卻暴露自己戴住有色眼鏡真面目。
教人同政府講條件
議員噚日開會傾梅窩應否重開中學問題，鼠王芬話假如正生順利落腳梅窩，官員都唔好以為就此了事，「要諗吓點樣giveandtake，點樣畀番啲好嘢梅窩呢？」
佢建議可以邀請有質素學校到梅窩，開埋寄宿學校，相信會受居民歡迎。
鼠王芬發表高見後離開，在場唔少人對其言論卻如骨在喉，公民黨余大狀對鼠王芬說法不以為然，話擔心咁講會令人以為正生係「唔好嘢」，所以要畀番啲「好嘢」梅窩居民，佢認為梅窩是否重開中學，應該視乎實際需要而定，唔係作為對居民嘅「補償」，否則日後其他地區居民有樣學樣，同政府講條件、利益交換，仲成世界？
正生校長陳兆焯雖然聽得多類似歧視性說話，但對鼠王芬咁講都有意見，認為唔係幾好，希望各界唔好再戴有色眼鏡睇正生。