立法會議員足球隊早前向傳媒下戰書，相約踢場友誼波，大戰噚日喺大埔廣福足球場上演，議員隊精銳盡出，唔係議員自己踢，而係搵咗五個職業球員落場，其中兩個仲係港腳賴啟卓、郭裕洪，議員隊人強馬壯，賽果無意外驚喜，傳媒隊零比一輸波。
議員隊制勝一球由郭裕洪建功，傳媒隊面對甲組腳，基本上過咗中場就行人止步，好難深入敵陣，要埋門起腳更難，小輸一球已經算交足貨。立法會主席曾鈺成都有落場，不過踢咗幾腳就禮讓其他人，陳克勤、陳偉業、李永達、林大輝同長毛差不多走足全場。去到球場，長毛都不脫鬧人本色，頻頻鬧人犯規、茅波，都唔知點解咁鬼好氣。