陳慧琳（Kelly）前日在嘉諾撒醫院剖腹誕下6磅兒子，經過一天休息，她已可以下床，日內會秘密出院回家坐月，待孩子滿月後她會斷餵人奶，然後下月底會為即將推出的新碟極速復工，到9月就返內地做商演搵奶粉錢。
陳慧琳去年10月與劉建浩（Alex）結婚後火速造人成功，前日順利誕下麟兒，兩夫妻甚為興奮，爭着抱BB。榮升母親後的Kelly並未有退出娛圈意思，收身後便會復出，雖然一般女士生完孩子後至少要花幾個月才可收身成功，但Kelly自信十足，已打算下月底赴台錄音和拍唱片封面，9月更會到內地做商演。
老公全天候服侍
其實Kelly家境富裕，但如此快復出是因她熱愛工作，其經理人鍾珍昨日在電話中說：「Kelly個人好鬼急，乜都要快，根本唔可以閒落嚟，我哋想畀佢休息耐啲，佢都未必肯呀。估計下個月會錄埋餘下嗰半隻碟，9月會安排佢返大陸做一啲商演，總之係日間唔長嘅商演，佢都有興趣接嚟做。」
鍾珍續稱醫生建議Kelly餵一個月人奶就可以轉餵奶粉，所以用一個月收身後，基本上她已經可以安心出外工作，Kelly透過助手說：「我應該會餵個仔食一個月人奶，咁下月底復工，我諗唔會有大問題，雖然我鍾意做嘢，但都好緊張個仔，絕對唔會為工作疏於照顧個B嘅。」問到老公可有送大禮給她，Kelly說：「老公第一份大禮係佢每日24小時全天候服侍我，一直會陪到我出院。」
無意接纖體廣告
Kelly在懷孕期間獲不少廣告商支持，其中有收身纖體、尿片及奶粉廣告排隊等着她，但全被她推掉，鍾珍解釋說：「因為Kelly身形一向好fit，而且佢大肚只係重咗20磅，唔算好肥，佢拍收身廣告有欠說服力，尿片同奶粉廣告係有搵佢拍，不過未接住，因為都有老公搵奶粉錢咯。」
另外，香港及內地均有不少剪綵活動邀請她出席，但她要視乎狀態而定。早在懷孕期間，內地曾有娛樂商向她開價80萬登台一場，大約要唱約20場，預計有千萬進賬，但當時為了胎兒，她已將逾千萬酬勞拒諸門外。
靚湯保身可下床
Kelly產子後目前仍留院休息，其助手Leo昨午乘保母車到場，下車後就派飲品和蛋糕給在場傳媒，他說：「今日Kelly媽咪煲咗瘦肉粥、雞飯同魚湯，叫我帶嚟醫院畀個女食，希望佢傷口可以盡快復元，母子都可以健健康康，今日Kelly已經可以落床喇，但唔會畀佢行好多，因為啱啱生完都係要多啲休息。」
由於連日來有太多傳媒在醫院守候，故Kelly親友都未有到醫院探望，不過老公Alex就一直在醫院陪她。問到BB仔的英文名是否叫Chace？Leo說：「其實佢中英文名都未決定好，決定好會同大家講，Kelly呢兩日抱住BB好開心。」至於何時出院則要待醫生通知。此外，昨午王馨平與夫婿拿着花到醫院，記者問她是否來探望Kelly？她說：「唔係，我都唔認識佢，我只係嚟探朋友。」她上病房約逗留了一個小時後才離開。
採訪：王連連、胡比
攝影：羅德光、葉君海
娛樂資料庫：星媽急搵奶粉錢
陳慧琳婚後一星期即復工，如今又表明產後一個月就進錄音室，魄力驚人。不少圈中潮媽原來也事業為上，未收身也急急復出搵銀。
姚嘉妮（圖） 今年4月才誕下女兒Kyra，坐月僅兩周就接商場騷搵尿片錢。
LeahDizon 今年4月榮升媽咪的混血索女LeahDizon，日前出席名牌時裝派對爭取曝光。
娜奧美（NaomiWatts） 澳洲女星娜奧美屈絲，今年初誕下幼子，產後兩個月即為新片開工。
金喜善 今年1月誕下女兒後，休息三個月即收身成功，現身為其執筆的育嬰書舉行簽名會。
謝安琪 07年6月為張繼聰誕下愛兒張瞻後，11月便全面復工，不過身上仍有20多磅肥肉，造型嚇人。
李嘉慧 名模李嘉慧06年生女後不足一個月已復出為LV行騷，穿上深色乾濕褸遮掩浮腫身形。
資料來源：《蘋果》資料室
