新宿事件　電影節三級版足本上！

睇完呢套戲，我會畀10個珍！以前打足120分鐘嘅成龍大哥，今次變成唔識功夫嘅普通人，更斯文到勸兄弟們收手，睇到O晒嘴；唔打！唔等於冇賣點，事關碟版收錄自香港國際電影節開幕電影嘅三級版，以往入戲院冇機會睇到嘅血腥場面，今次足本送上！

記者：陳國輝

潛逃東京搵女

背景以中國人蛇混進日本當黑工為開端！鐵頭（成龍飾）為尋找失去聯絡女友（徐靜蕾飾），冒險偷渡往日本打探消息。其間認識了幾名中國黑工，更建立起幫會進行非法活動；後來觸怒日本當地黑幫，並出現黑吃黑事件，令新宿歌舞伎町變得更複雜。

■鐵頭只希望帶女友返中國生活，惜此情不再。

中日黑幫搶地盤

近年睇黑幫電影，只想起「杜Sir出品」，一嚟佢產量超多，二嚟畫面構圖好男人味，帶埋女朋友一齊睇，隨時悶親另一半！
《新》由爾冬陞導演，雖然故事性質類似，但味道不同，電影着重人性，幾名主角中，以吳彥祖最突出，佢膽小，但有義氣；直至遭受另一黑幫不斷折磨，態度開始180°轉變，以自私、貪心、暴戾來保護自己，點知到頭來，結局卻慘不忍睹。

■內地黑工點樣喺東京生活？大哥做活生生演繹。

■日本黑幫特別鍾意玩刀、劍、槍，超惡！

三級血腥唔夠喉

跟戲院版最大分別，係影碟收錄了香港國際電影節嘅開幕電影版；上畫時大家喺戲院睇嘅只係IIB級，而影碟版則列為III級，意思係多咗血腥場面！好似斷手條條Fing、鐵枝插穿喉，甚至死到咇腸等核突畫面，影碟版會足本播放，但加埋晒究竟有幾多分鐘？咁就要睇晒兩個版本先知喇！但係有人話，影碟與戲院版區別唔明顯，且同樣註明119分鐘，跟網上傳出嘅3小時加長版，似乎相差太遠！