曼聯前鋒朗尼喺法國度假時差錯腳扑親，搞到左耳掛彩仲要縫咗45針，但佢未算最黑；事關利物浦後衞奧利里奧同佢班細路踢波時，不慎扭傷膝頭，原本估計喺手術之後至少要唞半年，搞到領隊賓尼迪斯要暫時擱置出售杜辛拿嘅計劃，好彩最新證實只需唞一至兩個月，總算虛驚一場。至於馬德里體育會後衞佩尼亞就仲大鑊，喺家鄉阿根廷炒車，鎖骨斷咗，好彩人冇事，不過就肯定參加唔到球隊嘅季前操練。學DoDo姐話齋，意外係意料之外，有時好難避免，但好似奧利里奧同佩尼亞咁，如果佢哋係小心啲，或者可以避過一劫，希望好番之後可以學精啲啦。
度假受傷：朗尼（曼聯前鋒）、奧利里奧（利物浦後衞）、佩尼亞（馬德里體育會後衞）
操練受傷：蘭特奴（里爾門將）、路菲斯（利華古遜中場）、阿歷士施華（漢堡後衞）、洛根拜利（慕遜加柏門將）、迪施高（禾夫斯堡前鋒）