有云人生七十古來稀，但年屆八十的顧媚，有如晚霞中的一道彩虹，人生越活越精采。顧媚3年前與兩位胞弟顧嘉煇和顧嘉鏘聯合舉行畫展後，今個月在香港大學承辦下舉行《纖雲巧染顧媚繪畫》，展出約55幅現代水墨畫，大前日在大學美術博物館舉行開幕禮，顧嘉煇也有出席。
走遍大半個中國
自幼熱愛繪畫的顧媚，題材以寫雲霧為主，因她鍾情雲霧間無拘無束的形態，變化之大令人有遨遊天際的感覺，而每一筆都是任隨心意而畫，為了尋覓靈感，她走遍大半個中國，並曾與邵逸夫爵士（六叔）及其太太方逸華等暢遊黃山、泰山、武夷山和廬山等，六叔對其獨特畫風甚為欣賞，並曾多番光顧，顧媚日前接受本報記者專訪時說：「一次為咗去黃山睇雨後雲海，我喺嗰度住咗一晚去等，可惜冇落雨，不過黃山雲海同樣令人着迷。」
顧媚的現代水墨作品，畫風豪邁，盡顯男兒氣概，有些欣賞者更不信是出自女兒家手筆，她笑說：「係呀，有啲人唔信係我畫，我咁弱質纖纖，我都覺得自己啲畫幾豪放。」
採訪：陳寶明 攝影：陳志嵐
用色細膩講求視覺
顧媚笑指每幅畫也是其心中所愛，難以抉擇當中至愛，但仍重點介紹以下4幅作品。
四季 2008年作品
「一幅畫嘅視覺效果好重要，春夏秋冬，我用顏色分開四季，春天用綠色，因為有春回大地感覺；夏天用黃色，有一種陽光開心、金光燦爛感覺；秋天較有詩意，用紅色較適合，秋天來臨會遍地紅葉；冬天用紫色、藍色為主，感覺較寒冷。」
黃山 2008年作品
「黃山嘅石大部份係長方形，所以要取其氣勢，松樹嘅形態就好特別，黃山上嘅雲海係我自己加上去。黃山本身已經氣勢磅礡，我都去過黃山睇雲海景色，不過我好少畫實景，我鍾意用自己嘅意念，再用抽象法繪畫出嚟，所以我每幅畫都唔一樣。」
夢鄉（一） 2008年作品
「呢幅畫冇分季節日子，係一個夢境，所以我用咗好多色彩，唔屬於冷色又唔係暖色，我希望有啲思想奔放感覺，幅畫用咗一個月時間畫，因為幅畫太大，唔可以一氣呵成，要分開慢慢畫，不過個構圖又唔可以散，有時我畫畫吓要行到幾十呎外睇，因為遠睇同近睇嘅視覺效果好唔同。」
抽象畫 2009年作品
「我近期所畫嘅都較抽象，冇乜形態所限，有時一筆過畫，我啲畫一路畫一路有變化，係好隨自己嘅意念去畫，雖然抽象不過要講求筆墨同構圖，而且我好少題字喺幅畫上。我啲畫唔係好襯有文字，我最多用圖章蓋個名上去就算。」
《纖雲巧染顧媚繪畫》
地點：香港大學美術博物館（香港般咸道94號）
日期：7月7日至9月13日
時間：星期一至六 9:30am至6:00pm
星期日 1:00pm至6:00pm
公眾假期休息
免費入場
註：今日6:00pm舉行即席揮毫活動
資料庫：不慕雲雀慕浮雲
顧媚原名顧嘉瀰，1929年生於廣州，書香世家，50年舉家移居香港，成為著名歌手，胞弟顧嘉煇則是名作曲家。顧媚61年加盟邵氏，因歌聲甜美被譽為小雲雀，63年開始隨趙少昂習畫，70年放棄電影及樂壇事業，專心從事繪畫工作，擅長繪畫雲霧，分別在世界各地舉行個人畫展。
