有晚凌晨3點幾載客入小瀝源，回程兜入沙田市中心，博攞番個客出九龍。去到新城市廣場先知唔對路，成條沙田正街擺滿的士，不過攝晒喺中線，好似摩西分紅海咁壯觀。擺正路中間，皆因左線要留番畀巴士入站，其他車得番快線行。半夜三更拉龍，其實對其他車無乜影響，可悲嘅係靜英英仍然拉龍死守，夜更的士真係好難撈。
其實唔止新城市廣場有咁嘅情形，尖嘴碼頭私家車落客處，停車車龍可以拉到去文化中心燈位，中間仲有幾架五噸半喺度落貨，幾乎頂住十字路口，光天化日繁忙時間都咁搞，離譜啲喎！我就見過有人唔知碇，俾條車龍誤導，順行左邊入咗巴士專線，咁樣俾人張幾百蚊牛肉乾，真係多得佢哋唔少。
文：黃師傅