政府宣佈金管局任總10月退休後，卻遲遲未正式公佈接任人選，「候任」金管局總裁、特首辦主任陳德霖苦候多時都未能凱旋而歸，似乎已經心急到等唔切。佢日前率先同一眾高官老友食飯，可能預先慶祝入主金管局。
今個星期二晚上8點鐘左右，中環鏞記門外禁區停咗幾架AM車，商務及經濟發展局局長劉吳惠蘭、食物及衞生局常任秘書長孔郭惠清最先出現，差唔多同一時間，前工商局局長周德熙蒲頭，三人喺門口傾咗幾句，唔等齊人就上樓等開飯。
梁展文入新世界大廈
高官飯局食咗差唔多兩個鐘頭，到晚上10點幾鐘，一行人前後腳魚貫落樓，除咗上述三人，創新科技署署長陳育德，兩個退休高官地政總署前署長劉勵超、郵政署前署長譚榮邦都係座上客。佢哋離開酒樓後，搭遲一部嘅申訴專員黎年同前房屋及規劃地政局常任秘書長梁展文推開玻璃門，幾人揮手講拜拜後分道揚鑣。黎年往擺花街方向行，梁展文則沿威靈頓街走，一個人經安蘭街由側門入咗去新世界大廈。
梁展文退休後獲純官邀請加盟新世界，但被質疑有利益衝突，結果要匆匆辭職，立法會仍在調查佢退休後為大地產商打工有冇問題，佢理應唔使再去新世界返工，夜麻麻去新世界有乜搞作，外人無從考究。
最後離開鏞記嘅係特首辦主任陳德霖，佢同太太、積金局行政總監唐芷青雙雙現身，唔知係咪要埋單所以要殿後，兩人一齊坐車走人。據講呢班高官不定期有飯局，雖然部份人已經退休，但由於大家都係差唔多時間加入政府，算係同期出身，所以一直保持聯絡，加上做官多年，工作上有合作關係，好似當中有幾個人都先後在工商貿易科做過，因此比較熟絡。
傳下周公佈接替任總
呢次飯局係咪預先慶祝陳德霖升職，真係同枱者先知道，不過最新消息係政府下星期就會公佈陳德霖接替任總消息，同時任命政制及內地事務局副局長譚志源做特首辦主任。據講譚志源呢排亦向外露口風，暗示快將有消息公佈。
mailto:[email protected]