「大帝」俾佐敦「爆樽」？喺NBA權傾天下嘅騎士前鋒「大帝」勒邦占士，周三就爆出一單「瘀爆事件」。佢喺家鄉俄亥俄州嘅亞克朗大學（TheUniversityofAkron）搞嘅籃球訓練營，第1日就俾一個名叫佐敦哥羅福（JordanCrawford）嘅高中2年級生，喺一場訓練賽期間狠狠地「爆樽」；此一消息傳出後即震驚全球，我求大俠都嚇到假牙都幾乎跌埋出嚟，係咪真有其事先？
為咗查清楚件事來龍去脈，我求大俠即化身成「特務Adam鄭」尋根究柢，原來呢次訓練營係Nike同占士合辦，邀請咗全國80個具有潛力嘅高中生同「大帝」過招。占士貴為全球巨星，更係09年球季常規賽MVP，呢班年輕人當然想喺巨星面前露兩手啦！其中喺高中曾奪入樽賽冠軍、6呎4吋就讀XavierMusketeers嘅後衞佐敦哥羅福，就喺分組賽嘅一次進攻入面，做咗一件大多數NBA球員都做唔到嘅事，就係成功喺占士面前雙手大力入樽。
Nike大驚沒收錄影帶
呢個歷史性時刻俾記者米拿（RyanMiller）拍咗落嚟，佢當然諗住擺上YouTube同球迷分享；點知Nike即刻一句「Noway！」，話米拿同佢另一同事違反訓練營錄影規定，要佢哋交出比賽片段。
「大帝」至今都冇回應事件，但其中一位參加訓練營嘅高中生保維（DwightPowell），就喺網誌寫咗呢件事，仲講到真嘅一樣，話對佐敦哥羅福嘅入樽感到「極度震驚」。「大帝」俾人爆樽就冇得睇啦，不過都有唔少網民惡搞片（ http://www.youtube.com/watch?v=iZxlvR61zV0），真係冇癮。
講真，喺呢啲訓練營占士點會同你認真，我求大俠覺得Nike呢次太過大驚小怪啦！莫講話「大帝」，就連「籃球之神」米高佐敦搞訓練營嘅時候，都試過俾一個四張幾嘅CEO擊敗啦（ http://www.youtube.com/watch?v=uaqgn8f-zrs）！何況訓練營嘅目的都係幫啲後生仔「上位」，占士又何需介意呢！