轆Book:換喉改軨 迷人下半身

轆Book:換喉改軨 迷人下半身

BMWX635i出咗一年,新版50i先跟住到港,除升級更強勁嘅4.4LV8引擎、馬力達到407匹外,更換上極迷人嘅尾喉同Y形合金軨,下盤紮實步大力雄,未上車嘆豪華同操控,已被其下半車身深深吸引。

記者:徐影龍
攝影:梁細權
Model:Macy@PureModels

爆上400匹

X3同X5市場走向各有不同,正所謂大有大玩、細有細玩,估唔到寶馬未滿足,諗到結合單門Coupe同SUV元素於一身嘅X6新車系,一整個車身線條流線優雅得嚟,仍透着SUV筋肉力量感,文字上好難形容有幾靚,總之你喺街上偶遇佢,會有衝動舉起手機拍照留念。
新到港嘅X650i,外形上跟35i無分別,我就唔介意,咁靚嘅車款有排都睇唔厭,起碼有新軨新氣喉,好過換泵把頭燈為改而改咁畫蛇添足。要讚係骨子裏換入更強勁嘅引擎,由3.0L直6升級到4.4V8,馬力由306匹暴升到407匹,當然香港地好難發揮咁大馬力,但最實用嘅扭力峯值依然同35i一樣咁寬闊,而且由400Nm提升至600Nm,燈位起步、爬頭Cut線、坐滿上大斜等,全部同扭力有關,你唔會再嫌600Nm多餘喇啩?

■波棍同iDrive貼近手枕位,方便垂低左手Hea。

■中央置物格又大又深,攤直隻錶都掂唔到兩邊。

■後排專用冷氣出風及各種操控按鈕,一樣夠體貼。

■高車身,加上大天窗,開揚感十足。

■標準只配19"軨,但港版換上更大更靚嘅20"Y形合金軨。

■內櫳採用紅皮、黑底、銀邊三種風格,好豪華。

■前排頭枕凸起一嚿似枕頭,挨得好舒服。

豪裝內櫳只坐四人

車廂方面,紅皮Seat襯黑櫳,再以適量金屬銀邊點綴,具運動感之餘,視覺上亦唔會太刺激。電子波棍同iDrive系統,仍然係寶馬撒手鐧之一,不得不提X650i處處流露嘅體貼性,前排頭枕特別凸出一大嚿,初睇唔慣,實試過後,頭部承托又真係好舒服,尤其傾斜座椅後,十足一個軟熟枕頭,想瞓覺一定唔會輾轉難眠。前排中央手枕位隱藏置物格,大路嘢,不過最正係好Fit你隻左手擺放高度,揸自動波左手最無用,好自然會Hea喺手枕位,最重要係稍稍伸前左手,就掂到電子波棍同iDrive旋鈕,轉波、轉歌依然氣定神閒!較特別係後排設計,係兩張獨立座椅,中間為置物格,將賣錢實用性換成後排闊落舒適性。

■正因為獨立座椅關係,令後排都可享有符合人體曲線嘅座椅。

■570公升尾廂,電動尾門開合,實用至上。

BMWX650i

引擎:4,395ccV8+TwinTurbo
馬力:407hp/5,500-6,400rpm
扭力:600Nm/1,750-4,500rpm
傳動:6前速+/-半自動波
售價:$1,148,000
查詢:BMWHK(27145271)

■由舊款圓形尾喉換成方形,更襯口碑極好嘅Coupe式車尾。