ILoveUBoyz（艾粒）將於今年書展推出《艾粒電視台4》DVD，他們誓言要與一眾o靚模力拚，成為書展簽名會最多人撐場的一個攤位。阿占揚言到時要與Donald穿上超低胸衫上場，力谷深溝務求成為全場焦點。
今年是艾粒第四年推出《艾粒電視台》DVD，《艾粒電視台4》貫徹以往扮鬼扮馬作風，以不同造型示人。成員Donald指今次他們捨棄男扮女裝，大玩復古形象，當中最搞笑是取材於漫畫人物老夫子的老Kad子，他日前說：「我今次會扮大番狗，阿占就扮老Kad子，拍嘅時候我全程要跪喺地下，之後用特技執走我對腳，所以拍一個鐘已經腳都痹埋。」
撐本地漫畫家
阿占表示想拍出《老夫子》最常見的兩個題目，分別是《耐人尋味》及《無題》，後來才發現要拍四格漫畫的神髓相當困難，他說：「我拍完呢個老kad子之後，發現四格漫畫要講晒成個故事真係好難，我好佩服原作者嘅創作力，亦都希望多啲人可以支持番本地創作，因為香港有好多成功嘅漫畫家。」
粉絲等收簽名
由於今年書展有不少o靚模打正旗號推出性感寫真，問到艾粒可擔心銷量？阿占笑言一早已計劃好宣傳策略，他說：「我同Donald會去買件勁deepV嘅衫，呢排會多啲去做gym豐胸，o靚模有嘅我哋都有，我有信心我哋簽名會一定會最多人。」
Donald則認真地表示已構思別開生面的簽名會形式，他說：「次次舉行簽名會都好似行屍走肉咁，好快幫fans簽完名就算，今次我哋個簽名會最特別係唔幫fans簽名。買我哋隻DVD會有一張postcard，fans喺排隊冇嘢做嘅時候就喺postcard上寫上自己地址交畀我哋，之後我哋就會寫啲文字同簽名寄番畀佢。」
採訪：李珮洳
攝影：林德雄
化妝：Khakiof
MaeVonMakeUp
髮型：JohnnyofMotif
