今屆立法會首年會期收爐在即，做咗議員九個月嘅葉劉，噚日趁休會前請記者食壽司慰勞，佢話做議員比做官過癮，因為唔使跟口徑答問題。可以暢所欲言，葉劉噚日句句到肉，批評唔少副局、政助回答問題時僵化落伍，市民都唔想聽。
葉劉又逐一點評特首同幾個疑似候選人，佢指煲呔在答問大會上成日以「我冇嘢補充」做擋箭牌，穩陣但沉悶不堪，毫無政治魅力可言；唐公子精於迴避問題，又甚少單人匹馬上立會回應議員質詢，似未夠火候；鬍鬚曾表現弱雞，公眾形象差，未有特首相。
至於CY，葉太語帶不屑，冷笑一聲話：「不便評論。」隨即補充，「佢好努力、好努力，但未請我食飯。」佢自己又如何？葉太謙稱自己冇本事，「我身家唔夠厚，又冇父蔭，同埋唔係識得好多上海人！」