有時真係唔認老都唔得，坐得耐都覺得攰，老公最近換咗部改裝車，但佢呢排忙，順理成章就由我試車，美其名就話試性能，實則只係想玩想威啫。又估唔到踩咗粒幾鐘之後，成身腰痠背痛。老公就話不如換過張凳啦！吓？又關張凳事？係，原來部車無換桶椅，保護及承托力有限，處於高速又或者急速入彎時，唔能夠提供足夠承托力同保護，左右搖晃時身體會傾側，令人更專注同緊張，容易攰之餘，時間耐咗就腰痠背痛囉！原來係咁，老公更提醒我唔好習慣一坐上部車就開車，點都要校吓個方向盤。呢點我知喎，想要揸得輕鬆，除咗坐姿，握軚盤手勢都重要，若然雙手過份彎曲又或者太過伸直，都會影響到手臂肌肉，減低操控靈敏度吖嘛！
文：大姨媽