巴西師兄卡卡離開AC米蘭後，柏圖喺紅黑兵團嘅地位即時提升，坦白講，論球技、星味，佢有排都追唔到卡卡，但講到用情專一、純品就一啲都冇輸蝕，前日柏圖就同大佢兩年嘅巴西演員比托（Brito）喺里約熱內盧成婚，19歲仔就做老襯（比當年23歲結婚嘅卡卡仲要早），不嬲又冇桃色醜聞，驟眼睇又真係有啲卡卡影子。
柏圖近年入親波都會整個心形慶祝手勢，送畀比托，原來小妮子喺巴西名氣唔細，拍過一啲肥皂劇，更加喺《Playboy》雜誌拍過一啲性感艷照，而自從07年同柏圖相識相戀，雖然曾經因為相隔兩地鬧分手，但呢段感情最終都經得起考驗，前日拉埋天窗。
低調婚禮為AC冲喜
成個婚禮都低調，賓客少，證明柏圖絕對唔係爭出風頭嘅人。回想當初傳出情變時，柏圖因為心情差而影響喺球場上嘅表現，家陣做咗老襯，專心喺球場搏殺，有助踢出更高水平。唔少巴西名將，好似阿祖安奴甚至「細哨」朗拿甸奴都曾經因為私生活唔檢點而影響足球事業，相比之下，卡卡同柏圖呢類都算異數。
話時話，AC米蘭近期諸事不順，正好趁柏圖辦喜事冲喜吓。自從卡卡改投皇家馬德里後，教練李安納度起勢向球迷派定心丸，話冇卡卡一樣掂，而之前傳出想買柏圖嘅車路士又靜晒，似乎柏圖呢個7號仔留隊擔大旗嘅機會真係好高。
AC下月有重要收購
當然，咁又唔代表AC完全好景，好似早幾日AC開操，大班球迷喺練習場外示威，有啲仲對住職球員豎起中指；梗係啦，雖然柏圖多數留隊，但隊波仲未有夠份量嘅收購，副會長加里安尼急急公開話8月就會有重要收購，怕且都係路爾斯法比安奴。