股海氣氛雖麻麻哋，不過細價股個別表現就唔曳，呢種環境當然最令活躍散戶開心，事關在調整市中捉到一隻當炒股，感覺梗係爽過人。
專門收購舊樓的田生集團（8136）近期升勢都算勁，股價由0.12元水平升至昨日最高0.50元，一個月唔夠已累升達3.1倍。以香港彈丸環境，收購舊樓係一門大有可為的生意，田生具一定概念。有口痕友揣測，田生升得咁勁，話唔定有好消息跟尾。
首站目標1.15元
再生能源係年內股海焦點，中國風電（182）上月創出52周新高1.15元後，股價一度調整至0.78元，但家陣似乎企穩陣腳，昨日逆市升3.4%，收報0.90元，似是新一浪升勢前之熱身，伺機買入，短炒以1.15元為目標，如能突破，下一站可見1.50元。
中國風電業務不僅轉型成功，更與中電（002）組成合營公司進軍內地風電市場，深得基金大戶垂青。集團旗下項目集中在東北三省及內蒙，並剛獲遼寧省阜新市500兆瓦風電開發權。
方星俠