觸發老董腳痛嘅，係50萬人上街；煲呔講六四扮代表言論，終於自點死穴，激發幾萬人上街，政界近日竊竊私語，指煲呔頭頭碰着黑，似乎有迹可尋。自言略懂風水嘅建築界議員劉秀成話，煲呔前途係點，禮賓府風水係關鍵，佢建議煲呔應該搵人執執個風水局，否則可能好大鑊。
劉秀成爆港督府秘聞
哨牙通話自己唔係風水師，唔通劉秀成都秘藏一本《天圖佈局》？非也，原來佢有個舊同學係高人，精於術數，從呢位舊同學身上學到一啲皮毛，加上自己做建築師，有涉獵中國風水理論，因此粗通風水之說，佢噚日自爆多年前曾到港督府睇風水，當時已經發覺有問題。
據劉秀成稱，80年代初滙豐計劃重建中環總部，尤德邀請多個建築師到港督府，諮詢一下新大樓對中區規劃有乜影響，其間督爺忽然問到滙豐新總部會唔會不利港督府fungshui，劉秀成憶述當時同尤德講noproblem，「唔緊要嘅，呢度有咁多嘢擋住！」
話雖如此，劉秀成噚日終於鬼拍後尾枕吐露真相，佢話其實當時覺得滙豐重建總部唔老利，但天機不可洩漏，佢亦冇在督爺面前講真話，「唔通我同港督講，話佢死梗咩！」唔知巧合定天意，尤德86年底在北京猝逝，成為唯一一位任內逝世港督。故人劫數難逃，劉秀成講起都頗為欷歔。
香港人一直以為狀似利刃嘅中銀大廈煞氣重，有損禮賓府風水，原來滙豐都係大患，劉秀成唔講都冇人知，風水師呃你十年八年，建築師似乎都唔好輕信。兩大銀行左右開弓，家陣煲呔以禮賓府為家，又在內辦公，豈非永無寧日？劉秀成話據知煲呔曾搵名家蔡伯勵指點，又有龍師傅幫手，任何奇難雜症，相信一早擺好個局化解。
禮賓府「大鑊」要改改
然而煲呔個勢似乎唔多掂，有冇需要挖窿或者搞吓種生基轉運，甚至搬走避劫呢？劉秀成話萬萬不可動煲呔，因為禮賓府係龍脈所在，郁咗佢仲麻煩，反而去年新裝置嘅幾隻衞星天線「大鑊」有需要改改佢。劉秀成語帶雙關咁話，咁多鑊擺在眼前，「相信啲鑊要慢慢解。」
mailto:[email protected]