無綫新劇《王老虎搶親》下周一播出，由於女主角蘇玉華和黃淑儀均不在港，故昨日在電視城古裝街舉行的宣傳活動由錢嘉樂、陳鍵鋒和胡定欣等人孭飛，錢嘉樂和陳鍵鋒即場進行極速換古裝的比賽，變身成王老虎的陳鍵鋒抱着女裝打扮的錢嘉樂合照，場面搞笑兼惡心。
反串嚇親人
事後陳鍵鋒笑稱在劇內早已看慣錢嘉樂的女裝扮相，他笑說：「我第一次見到錢嘉樂扮女人個樣，都俾佢嚇到呆咗幾秒，仲笑到唔識得講嘢，不過我哋有好多場反串嘅戲，所以睇得多都慣咗。」
錢嘉樂和陳鍵鋒異口同聲表示對收視有信心，前者更處男下海首次獻唱主題曲，但被取笑因此而拉低收視，錢嘉樂笑說：「我唔驚會拉低啲收視喎，德哥（監製潘嘉德）搵我梗有佢理由，可能我遲啲仲有機會攞埋最佳新人獎、最佳歌手、同埋飛躍男演員，仲有可能同柴九（黎耀祥）爭㖭呀。」
採訪、攝影：何慧斯